شروق الشمس

شروق الشمس

حيث للتميز إبداع


    قصة سالم أنا ما أدانيك

    شاطر
    avatar
    بقايا جروح

    عدد المساهمات : 22
    نقاط : 43
    السٌّمعَة : 0
    تاريخ التسجيل : 19/10/2010

    قصة سالم أنا ما أدانيك

    مُساهمة من طرف بقايا جروح في الثلاثاء أكتوبر 26, 2010 12:56 pm

    يبت لكم قصة واااايد حلوه إنشاء الله تعيبكم وهيه عبارة عن أجزاء

    وأبي تفاعل عشان أنزل لكم الاجزاء الاخرى..... تمام
    الجــــــــــــــــــــــــــــــــــــــــــــزء الاول

    عايلة بو خليفة: عندهم 5 عيال: 3 بنات وولدين

    بوخليفة وام خليفة متقاعدين

    عيالهم: _ علياء : اكبر وحدة من بين اخوانها وخواتها ، عمرها 19 سنة، تدرس فكلية دبي ، البنت حلوة عيونها وساع وعسليات ، شعرها طويل اسود، والخشم الطويل.............. واللي يشوفها يقول هذي وايد شايفة عمرها، ودوم مسوية جو للبيت...

    _ خليفة : ثاني عيالهم ، عمره 15 سنة في المدرسة .... ثاني ثانوي ادبي ... شكله : طويل وحليو من يشوف بنية اتخبل عليها.... ودوووووووووم يظهر ما يتم في البيت

    سلامة : عمرها 11سنة في الصف الخامس ودوم متسلطة ع اختها عاشة

    عاشة: عمرها 9 سنين تشبه اختها علياء يوم هي صغيرة، ودوم اتضارب ويا سلامة كل وحدة تاخذ حقها من الثانية طبعا بعد الزعيج والصياح

    جاسم: عمره سنة يمشي

    اليدة ( ام راشد) : ساكنة حذالهم، وكلهم ساكنين فدبي

    عايلة ( بو عبدالله): عندهم ما شاء الله 6 اولاد و6 بنات ف ام القيوين

    عايلة ( بوسالم) : عندهم ما شاء الله 8 بنات و3 اولاد ، وبو سالم متزوج من ثنتين وعايشين ف ام القيوين

    _ سالم : اكبر واحد بين اخوانه عمره 23 سنة مخلص دراسة وجامعة ويدور ع شغل ويحب البنات يركضون وراه ( هذا شعاره في الحياة) ومتكبر لأقصى درجة لانه حليو وشايف عمره وكشيخ درجة اولى

    _ راشد: عمره 19 سنة توة مخلص ثانوية عامة


    كانت علياء يوم هي صغيرة هي ويدوتها كل عيد يسيرون عند اهلهم فام القيوين....... ويدوتها اتحبها وايد لدرجة اتخاف عليها من الهوا الطاير........................

    والحين ما شاء الله عليهامن قامت تكبر، امها ما تخليها قامت اتخاف عليها..............

    علياء: امي دخيلج خليني اسير ويا امي العودة، حرام اخليها روحها!!!!!

    الام : ترى يوم ما تحصل حد سارت ويا اختها ، وش لج فهالسيرة؟

    علياء: يالله امي اخر مرة

    الام: بخبرج انتي شو سالفتج، اشمعنى الحين تبين اتسيرين؟

    علياء: دق فراسي اني ابا اسير

    الام: ماشي سيرة

    علياء وهي متغايضة: ماعليه .... ماعليه!!!

    فكرت شو تسوي........... تبا تظهر........... يدوتها ما تقدر تقنع امها، كانت صدق ملانة وتبا تظهر ومحد عندها بيظهرها غير يدوتها

    سارت عند ابوها : السلام عليك ابويه

    وحبته ع راسه

    بوخليفة: عليكم السلام.... اكيد تبين شي ما تين مني والدرب .... وخصوصا عليج هالابتسامة

    علياء: ههههه ابويه بغيت اسير ويا يدوتي وامي هب مخلتني

    بوخليفة: جيه امي وين سايرة؟؟؟؟؟؟؟

    علياء: بسير عند اهلنا البدوان

    بوخليفة : سيري ما عليج منها انا برمسها .. والله لو مكان ثاني جان ما خليتج....

    وصلت عند الباب وردت

    بوخليفة : فخاطرج حاية
    علياء: ههه ابويه بغيت فلوس حق الموتر ( وبدلع)

    بوخليفة: بخبرج جيه انتي ظهرتي ليسن وموتر من الوكالة وانا مادري؟؟؟!!

    علياء: ياريت.......................

    بوخليفة: احلمي فأحلامج بتحصلينهن

    علياء: يالله ابويه الله يخليك عسب اجهز عمري

    بوخليفة : خذي هذي 1500 حق الشهر

    علياء: معاش بشكارة؟؟!!!

    بوخليفة: مب عايبنج ... رديهن

    علياء: لا خلاص ... خلاص

    باسته ع راسه وظهرت

    سارت عند يدوتها

    اليدة: ها عليوه وافقوا

    علياء: هيه امي وافقوا

    اليدة: نشي من الساعة 6

    علياء اعنبوا يا امي من القايلة؟

    اليدة: تمي في البيت عيل

    علياء: لا خلاص اخر مرة

    ردت علياء البيت والام محرجة منها

    الام: عليووووووووه تعالي هني دهديه

    علياء: نعم امي بغيتي شي

    الام : شوفي ابوج علمني .... لكن هذي اخر مرة اتسوين شي من ورايه فهمتي ولا لاء؟

    علياء: على راسي كلام الزعيم والزعيمة

    الام : عن قلة الادب احشمي وارمسي عدل

    علياء: ان شاء الله عمووووووووووووووووووووه

    الام: شوفي يوم بتسيري هناك ما اتحطين مكياج وايد...... خففي من هاللغواط اللي فويهج ومب تلبسين بنطلون يا ويلج وسواد ليلج ...... البسي تنورة وقميص او جلابية .... ويا ويلج ان اضاربتي وياهم ، بحش ريلج حش واسمعي كلام يدوتج

    علياء تقاطعها : حشا دستووووور قوانين هب نصايح

    الام: عيل جرّي مكانج ما شي سيرة

    علياء: يالله خلاص .... على عيني وعلى راسج

    سارت اتجهز اغراضها لأنها بتم عندهم يومين واصلا عندهم عرس هناك
    الجـــــــــــــــــــــــــزء الثاني:
    راحت تنام من الساعة 12 لانها كانت متعودة تنام الفجر تصلي وتنام ........... دوم اتطالع هالتيلفزيون والمسلسلات الاجنبية والمكسيكية

    المهم يت البشكارة اتوعيها الساعة 6... بطلت الباب كأن حد هاجم عالغرفة

    فبطلت عينها من الزياغ واتقول: بسم الله شو مستوي؟!!!!

    وانها اتشوف الخدامة عند الباب : ماما قومي

    علياء ما سوّت عاب وطاب .... شافت النعال تحت شلته وفلعتها

    وقالت: عنبوج ما اترومين تفتحين الباب بالراضة مثل خلق الله ؟؟؟ ما عليه يا مسودة الويه انا براويج ... انفدي عن ويهي

    والمشكلة انه الفلعة ما يت عالهدف لانه البشكارة وخت من الزياغ والتحليف اللي ياها

    قامت سارت اتغسلت واتوضت وصلت وحطت جحال خفيف ( اونها تسمع كلام امها)

    لبست ملابسها وعبايتها وشيلتها .... نزلت تحت ادخنت واتعطرت والبيت هادي ماشي زعيج فيه..... وسارت عند يدوتها

    ثرها يدوتها في السيارة اتضرب هرنات عسب عليوه

    علياء: يالله بصباح خير بسج من الهرنات ..... الدريول توة يديد ما يفتهم عن اتعلمينه هالسوالف!!!

    اليدة: وينج انتي كنت بروح عنج

    علياء: توني نازلة

    اليدة: ياللله بابا اتحرك ..... توكلنا على الله

    يوم توهم طالعين من البيت

    علياء: وقف !!! وقف!!!

    اليدة : اشبلاج؟؟

    علياء: اويييييييييه ...نسيت شنطتي عند الباب من يولة الهرنات

    اليدة: حسبي الله ونعم الوكيل .......... خلينا انكمل ماعليه البسي خلجاني

    علياء: امي انا البس خلجانج هههههههههه مستحيل

    اليدة: اشعنه والله مب من مقامج يالدانة

    علياء: لا مب جيه بس امي بتظهر علية مشنجلة ( قصيرة)

    اليدة: لا حول لله .......... بابا رد البيت

    الدريول : ها .. ها... ماما

    اليدة: بابا رد البيت ... بيت مال انا بيت ... مافي معلوم

    علياء: دريول واصمخ اكملت

    الدريول: ما في معلوم ماما

    اليدة: ما مداك .... عنبوا اموصاي ومدلينك!!!!

    اليدة: علياء دليه البيت

    علياء: جيه انتي ما ادلينه .... اعترفي ليش؟؟

    اليدة: حلجي يعورني
    ثرها روحها اليدة ما اتدل

    علياء: ههههههههههههههههه

    علياء: بابا سير يمين .................... لين ما وصلوا البيت

    نزلت خذت شنطتها وركبوا الموتر

    علياء: ياللله بابا

    لين يوصلون هناك يبالهم 45 دقيقة .... بس ذكاء الدريول خلاهم ساعة ونص يدورون على عمارهم.......... وطول الوقت الدريول يطالعها ويغمزلها

    واليدة فخبر كان راقدة .... وهي طبعا لسانها ميودتنه عسب..... يوصلون عندهم بالسلامة

    ويوم وصلوا نزلت اليدة وقالت له : نزل الاغراض وروح البيت

    الدريول: مافي معلوم

    اليدة: انزين عيل تم هنيه ومب اتسير مكان ثاني يا ويلك ....... عليوه انزلي وصلنا

    علياء: اسبقيني يايتنج بنزل اغراضي

    يوم شافت يدتها سايرها

    نزلت من الموتر وهي واصل الجايج عندها 180 درجة

    علياء: اييييه انه يااللي ما تسوى شي ، جيه اتطالعني من الجامة .... ما تستحي ع ويهك؟؟؟

    الدريول: ما في معلوم

    علياء ترجمت كلامها كله بالانجليزي واتفاتن وياه

    ( عند اليدة)

    اليدة: السلام عليكم ... هود هود وينكم؟؟؟

    ام عبدالله: اقربي ... اقربي

    اليدة: حد غريب؟

    محمد : اقربي يدووه

    وبوعبدالله: اقربي اقربي حيا الله زارتنا البركة

    محمد قام وحباها ع راسها: اشحالج يدوه؟؟

    اليدة: بخير الحمدلله .... اييه يا حافظ اتريجوون .... يالله مغوات خبز الرقاق ويالدهن

    ام عبد الله : سمي بسم الله وحطي ايدج وكلي

    وفجأة يسمعون الدريول يزاعج

    اليدة: بسم الله شو ها؟؟ دخيلك يا محمد سير طالع شو بلاه هالخبلة الدريول

    محمد سار يطالع شو مستوي وانه يشوف وحدة عاطية ظهرها له واتفاتن عالدريول ولكن شو صوتها ..... دخل الصميم ... والدريول.يطالعها وزايغ

    ويقوللها: ماما ردي مفتاه مال انا

    علياء: اتهبي والله لكنسل ويزتك .... احين تبا المعاش؟!!! جان حللته بشي زين هب شين!!!

    وصدت تبا ادش البيت اتشوف فويهها محمد ....

    هو انصدم انه شاف وحدة عليها جمال ماشافه فحد ... وهي يوم شافته احمرت واتقول فخاطرها هذا من متى موجود؟؟ اكيد سمع كل الكلام ... ويييييييه فشلة

    علياء ومنزلة راسها : السلام عليكم

    محمد: عليكم السلام والاكرام ... ما شاء الله شو مستوي ... ليش يزاعج الدريول؟؟

    علياء: خله عنك ما عنده سالفة..... وين اميه؟؟

    محمد : منو امج الغالية؟؟

    علياء:عن الاستهبال يا محمد وين امي العودة

    يوم لفظت اسمه حس بنفضة فينبه

    محمد: اسمحي لي الغالية ما عرفتج .. منو انتي؟؟

    علياء: انا علياء بنت خليفة بنت خالك

    محمد وهو منصدم: والنعم

    فخاطره هذي اللي ألعب وياها من زمان طلعت حورية وانا مادري!!!!!

    علياء: ينعم بحالك

    محمد: يدوه هناك داخل اقربي

    علياء: امممم قريب

    هي تمشي وهو يطالعها ... حست انه هو يطالعها .. حليلها يوم وصلت عند الباب اتخرطفت من النعول المصففة

    محمد: سلمتي .. سلمتي!!

    وعلياء ويهها محمر واتقول فخاطرها: الله يغربل هالحالة .. ما تسوى علية هاي السيرة يوم هالسوالف تستويلي!!!

    دشت وسلمت ع يدها و على ام عبدالله وقالولها تتريج وهي ماطاعت يوم هذاكي مشغل كشافاته عليها
    بس شربت قهوة عسب ما تنحرج ومع انها ما تداني القهوة ولا اتطيقها بعيشة الله وبصوت خفيف: مرة!!! عنبوا ما ايحطون سكر فيها!!

    ومحمد من وصلت وهو حاط عينه عليها... يوم خلصوا قاموا ... ومحمد ما وده يسير لكن امه حوشته هو وابوه....

    يو البنيات عشان يسلمون عليهم واليدة ما اتروم اتقول شي بس من خاطرها متحرقصة .. شو سالفة الدريول؟؟؟

    وعقب نست السالفة

    علياء يلست ترمس ويالبنيات وظهرت وياهن يتحوطن في السكيك ... كان امان ما يوصف بس كانوا لازم يتغشون وهي لا... لانها مب من عوايدها انها تغطي ويهها الا اذا كانت حاطة مكياج وايد
    ويتهم عقب شيخة بنت خالها: السلام عليكم ، منووه ؟؟ علاية؟؟؟ زارتنا البركة

    علياء اتوايهها: عليكم السلام.... اشحالج شويخ؟؟

    شيخة: يسرج الحال.. وينج من زمان ما شفناج يالقاطعة

    شيخة اتكون اخت سالم

    علياء: موجودة والله مشاغل الدنيا

    شيخة: جنج معرسة وانا مادري؟

    علياء: الله لا ايقوله .. لا زواج ولا شياته دراستي اهم من هالخرابيط

    شيخة: هذا الكلام العدل وبعدين لاحقين عالزواج.... القطار موجود ويتريانا

    البنات يضحكون

    عاد كل وحدة قامت اتعزم عليها انها تي بيتهم .. وحدة على ريوق والثانية على غدا والثالثة على عشاء

    وهي مستحية منهم... وفي شي نسيت اقوله الكم انه اخت شويخ هي اللي بتعرس

    شيخة: شوفو اليوم علاية بتتغدا عندنا وباجر بعد

    سلامة ربيعتهم: يالطماعة مايستوي ليش عاد نحن شو بيبقى لنا وقت وياها؟؟

    شيخة: اليوم اميه طابخة الغدا حقها خصوصيوباجر لانه العرس

    علياء: اعنبوا شوي شوي علية

    سلامة: حار ب حار

    ساروا البنات بيوتهم وعلياء وشيخة ساروا البيت

    يوم وصلوا علياء وايهت ام سالم

    ام سالم: يا مرحبا وسهلا زارتنا البركة

    علياء: اشحالج خالووه

    وفجأة يدشون الصغارية وعلياء اتحببهم وحوشتهم شويخ

    شيخة: يالله برع فكونا من حشرتكم

    علياء: خليهم حرام هب مسوين حشرة

    شيخة: خليهم.... روحهم طفرة

    ام سالم اتطالع علياء

    ام سالم: ما شاء الله عليج يا علياء كبرتي وحلويتي

    شيخة: امي دبي محلتنها هههههههههه

    علياء: الله يسلمج يا خالوه بس محد يقدّر

    وفنفس الوقت اتطالع شويخ

    ام سالم: علاية اتعرفين تطبخين؟

    علياء: اسمحي لي خالوه ما اعرف الا شوية

    ام سالم: افااا ما عليج انا بعلمج

    علياء: ان شاء الله خالوه

    ام سالم: انتي عاد ما تين مثل قبل ... عاد تعالي هب ما تين

    علياء: فالج طيب خالوه

    شيخة: فالج طيب هاااااااااه

    ام سالم: ونتي وشلج؟؟

    شيخة: رزة!!! يعني ماروم اتم وياها روحنا

    علياء: استحي شويخ شو هالكلام خليها ع راحتها .. انا عايبتني سوالف امج

    شيخة: شو رايكم اخليكم وأسير عنكم؟؟

    ام سالم: ترومين بعد؟؟!! عصا محناية ع ظهرج...

    تمت ام سالم تسولف ويالبنات

    وفي البيت الثاني... البنات خبروا اليدة انه علياء باتغدا عند ام سالم واطمانت

    وعند ام سالم في المطبخ

    بو سالم: السلام عليكم... ما شاء الله منو ياينا؟؟

    علياء: اشحالك خالي؟

    بو سالم:شحالج يا بنت خليفة؟؟

    وسارت حبته ع راسه

    علياء: الله يسلمك خالي

    بوسالم: شو تسوين عند الجدور؟

    علياء: ماشي يالسة اطالع خالوه

    بوسالم: جيه مخلتنها في المطبخ وياج ... جيه وين شويخ عنكم؟؟

    ام سالم:شويخ داخل وعلياء تباني اعلمها الطبخ

    بوسالم: اطلعي من المطبخ عن الصهوار!!

    علياء: حرام خالي من الصبح خالوه تطبخ وانا يالسة اطالعها ... شوف ويهها كيف محمر

    بوسالم: لا اتعبين عمرج يا ام سالم.. صحتج بالدنيا

    ام سالم فخاطرها : هاي اول مرة يقوللي هالكلام

    ام سالم: لا اتحاتي .. انته ادخل ونحن يايينك

    بوسالم: وين سالم وراشد والصغارية؟؟

    ام سالم: سالم يقول يمكن ايرد عالغدا وراشد بيي الحينه ... علياء خذي الدلال ووديهن داخل وانا احين يايه

    علياء: ان شاء الله خالوه

    سارت داخل لقت غرفة مجابلة الصالة مفتوحة وشيخة اتنظفها

    علياء اتدق الباب واتقول: شيخة انتي داخل؟

    شيخة: هيه الغالية اقربي

    علياء: جريب.. شو ماشاء الله تنظفين حجرة اخوج؟

    شيخة: هيه والله يقول انه بيي من الدوام

    علياء: منو منهم؟؟

    شيخة: سالم

    علياء: اتصدقين مول نسيت اسامي اخوانج وخواتج بس ما نسيتج ولا خالوه ولا خالي

    شيخة: تسلمين الغالية... علاية تعالي براويج صورة اخووي
    avatar
    Admin
    Admin

    رقم العضوية : 1
    عدد المساهمات : 186
    نقاط : 291
    السٌّمعَة : -1
    تاريخ التسجيل : 11/09/2010
    العمر : 24

    رد: قصة سالم أنا ما أدانيك

    مُساهمة من طرف Admin في الأربعاء ديسمبر 22, 2010 5:07 am

    اكيد بتكوون قصة حلوووة لانها منك

    حملت هالجزء لما افضى بقرأة

    يسلمووو

    ولي عودة لبقية الاجزاء
    avatar
    بقايا جروح

    عدد المساهمات : 22
    نقاط : 43
    السٌّمعَة : 0
    تاريخ التسجيل : 19/10/2010

    رد: قصة سالم أنا ما أدانيك

    مُساهمة من طرف بقايا جروح في الأربعاء يناير 05, 2011 2:40 am

    تسلمي الغاليه ع المرور
    وغنشاء الله راح أعرض بقية الاجزاء ف اقرب وقت

      الوقت/التاريخ الآن هو الإثنين ديسمبر 18, 2017 5:47 am